Wanted “Hitman” nga naa sa posters sa malls nadakpan

CEBU, Philippines - Nasikop sa kapolisan ang usa ka lalaki nga wanted nga gikatahong usa ka kanhi hitman sa Akrho pasado alas-4 sa miaging hapon sa barangay Pasil sa dakbayan sa Sugbo.

Ang nasikop naila nga si Mark Anthony Santillas, 30, taga V. Rama, apan nagpuyo na sa barangay Pasil.

Sumala pa ni Insp. Wayne Magbanua, ang deputy chief sa City Intelligence Branch (CIB) sa Cebu City Police Office nga ang suspetsado nasikop sa mga sakop sa CIB tungod sa mga posters nga gipanghatag niini.

Pipila na ka semana  ang milabay nanghatag og posters ug bookmarks ang Cebu City Police Office nga dunay mga hulagway sa mga wanted sa dakbayan ug usa si Santillas sa mga naa sa hulagway ug silingan ra niya maoy nakasumbong sa iyang gikahimutangan.

Si Santillas adunay warrant of arrest nga giluwatan ni Judge Generoso Labra. Apan matud pa ni Magbanua nga gawas sa murder case duna pay laing record sa Homicide Section ang maong suspetsado nga nalambigit lang gihapon sa pagpatay.

Ang suspek nga nahinabi sa Banat News miingon nga sa korte na lang niya atubangon ang mga pasangil batok kaniya. Wa hinuon kini moangkon o mihimakak sa maong kaso, apan nahibulong siya kun nganong siya ang gipasanginlan sa maong krimen.

Iyaha usab gihimakak nga nadakpan siya tungod kay matud niya, mitahan siya sa iyang kaugalingon dihang may mipahibawo kaniya nga naa iyang nawong sa posters sa mga wanted diha sa tanang mga malls sa siyudad.

Usa ka 32-anyos nga lalaki ang nasikop sa kapolisan sa barangay Puting Bato, dakbayan sa Toledo tungod sa kaso’ng attempted homicide.

Ang nadakpan mao si Walter Alquezar, kinsa dunay warrant of arrest nga giluwatan ni Judge Albie Carmelo Pescadero.

Sila si Police Inspectors Gilfred Baroman ug Jovito Labra uban nila ni PO2 Bombino Enriquez ug PO1 Emmanuel Aragon midakop ni Alquezar bisan og misuway unta kini pag-eskapo.

Nasakmitan ang dinakpan og usa ka 38 kalibre nga revolver nga adunay lima ka bala sa iyang tambor ug lain pa g’yud nga siyam ka bala niini ug usa ka bala sa shotgun.

Gawas sa pending kaso niya sa hukmanan, si Alquezar mag-atubang na usab og laing mga sumbong kay nasakmitan man siya og wala’y lisensya nga armas ingon man mga bala atol sa iyang pagkasikop.  (BANAT NEWS)