Mga disgrasya atol sa Semana Santa bantayan

CEBU, Philippines - Gibutyag ni Sr. Supt. Noel Gillamac, hepe sa Cebu Police Provincial Office kon CPPO nga pahugtan nila ang pag-monitor sa isla sa Bantayan atol sa Semana Santa tungod kay mas daghang krimen og aksidente nga mahitabo sa maong dapit nianang mga panahona kun itandi sa ordinaryo nga adlaw.

Matud niya nga ang maong isla usa sa mga lugar nga dugokon og mga turista hinungdan nga kinahanglan kini og igong pagtagad.

Lakip sa mga kaso sa aksidente sa kadalanan mao ang overspeeding sa mga motorcycles ug ang pagmaneho ubos sa impluwensiya sa alcohol o druga.

“Now, we also want to enforce kaning mga motorcycles without registration, especially they have to limit the speed no along the highway because we noted an increase in accidents in Bantayan during Holy Week, labi na’g they are under the influence of alcoholic drinks, and driving a motorcycles along the highway,” dugang niya.

Plano ni Gillamac nga pun-an ang inspection areas sa Hagnaya aron paspas ang pagsulod sa mga turista sa pier.

Dugang niya nga gusto sa kapolisan nga maayo ang pagbiyahe ug dili mahasol ang mga pasahero.

Usa usab sa ilang prayoridad sa Semana Santa ang Minglanilla nga nabantog na sa “Sugat Kabanhawan” nga ipahigayon sa Easter Sunday. (/EIM)(BANAT NEWS)