Pito patay, 24 angol

CEBU, Philippines - Pito ka tawo ang patay ug 24 ang angol, lakip ang usa ka menor de edad human mibangga ang Fuso truck nga gisakyan sa mga biktima nga aduna usab karga nga mga hayupan sa kongkretong gate ug nalahos sa balay daplin sa dalan sa sitio Mabugnaw, barangay Guadalupe, dakbayan sa Carcar kagahapon sa udto.

Gideklarar nga dead on arrival sa Carcar Provincial Hospital si Nickson Albite, Wenceslao Famulagan, Agustin Alcain Sr., Yoyoy Barlaan ug Cristita Davin.

Samtang si Daniel Marson, namatay pipila ka minuto sa samang tambalanan samtang si Jovencia Davin nakabsan usab sa kinabuhi samtang gidala sa Vicente Sotto Memorial Medical Center sa dakbayan sa Sugbo.

Ang mga angol mao sila si Mario Famulagan, drayber sa maong truck, Fermin Sarcauga, truck boy, Medarda Malinog, Jelyn Malinog, Mamerto Familgan, Hitomie Familgan, Patrocinio Familgan, Randy Mier, Eddie Mier, Virgilio Mier, George Malinao, Felix Villarmente,

Jayniel Albeos, Felix Sapotera, Francisco Bañadas, Pedro Jabagat, Roger Oyangoren,

Teodoro Mabasa, Ronie Quiñones, Pedro Famat, Junior Lonzaga, ug Nigel Nacua.

Sa imbestigasyon ni PO1 Dennis Cabajar, traffic investigator sa Carcar Police Station , ang maong truck nga adunay plakang GDV 259 gikan sa Mantalongon, Barili ug paingon na unta sa lungsod sa Argao sa dihang kalit kining nawagtangan sa preno.

“Mechanical error gyud kay nawala man gyud ang brake unya didto na lang gibangga sa gate kay kung ngari sa pikas posible adunay madasmagan nga laing sakyanan,” matud pang Cabajar.

Samtang si Roberto Pamor kinsa sakay usab sa maong truck nagkanayon nga kusog ang dagan sa ilang gisakyan ug mao na lay ilang nabantayan nga adunay kusog nga buto.

“Nag-agit-it na inig kambiyo dili na kasaka mao na to guba na diay ang brake,” matud pang Pamor.

Ang drayber sa maong truck wala na makakontrolar pa sa kakusog sa dagan ug sa dihang niabot sila sa kurbadahon nga dalan nalahos na sila sa balay nga gipanag-iya ni Raquel Parason.

Matud pa ni Parason nga ang iyang mga anak diha sa unahan sa dihang kalit n kining misiyagit og tabang ug mao na lay iyang namatikdan nga adunay nagkadugo sa atubangang bahin sa sakyanan samtang ang uban didto mipilit sa atop sa ilang balay.

Si Famulagan pasakaan sa kapulisan og kasong reckless imprudence resulting in multiple homicide and multiple physical injuries and damage to property sa kapulisan. (BANAT NEWS)