Mga dagom giipon sa ordinaryo’ng basura

CEBU, Philippines - Ang Cebu City Health department maoy una nga departamento sa City Hall nga giisyohan og Citation Ticket tungod kay nasakpan nga ang ilang basura adunay mga ginamit ug wala pa magamit nga mga dagom.

Matud ni Grace Luardo, pangulo sa City Environmental Sanitation Enforcement Team (CESET), nga ang administrative officer sa City Health nga si Mario Calvo maoy giisyohan nila og citation ticket.

Duha ka adlaw human maisyuhi og citation ticket sa CESET ang opisyal sa City Health Department, gisusi sa Banat News ang ilang labayanan og basura ug may nakita na usab nga mga wala pa g’yud hinoon magamit nga mga syringe ug mga dagom.

Gawas sa daghan’g syringe nga may dagom nga wala pa magamit, duna pa’y usa ka matang sa Cream nga maoy gamiton sa mga doktor paghiling sa pribado’ng parte sa babaye nga himoan og hygiene.

Nahibulong ang Banat News kay ang mao nga mga cream wala pa mo-expire.

Si City Health Officer Daisy Villa mipasabot nga ang mao nga mga wala pa magamit nga dagom nasaypan lang nga basura sa tiglimpyo kay gipagawas man kini gikan sa usa ka kwarto nga gilimpyohan tungod kay adunay daghang anay.

Matud ni Villa nga dili nila tuyo nga ilabay ang mao nga mga kahimanan mao nga human matawag ang ilang atensyon sa Banat News ila dayon kini nga gipangkuha pagbalik.

Si Dr. Villa miingon nga mohangyo sila ni City Administrator Lucelle Mercado nga dili lang pamultahon kay wala sila’y intensyon sa paglapas sa balaod kabahin sa pagbuwag-buwag sa basura sama sa dagom nga ibuwag sa ubang sagbot.  (BANAT NEWS)