Naeskapohang mga polis gikasohan

CEBU, Philippines - Ang Provincial Investigation and Detective Management Branch nakakita og igong rason sa pagpasaka og kasong grave misconduct batok kang PO1 Julius Patac ug PO2 Glen Rosal human sa pag-eskapo sa usa ka piniriso nga babaye nga nagpasuso sa iyang anak gawas sa buhatan sa Consolacion Police Station sa miaging buwan.

Kini human nakita sa PIDMB nga sila si Patac ug Rosal nakahimo og act of infidelity in the custody of the prisoner. Ang maong kaso ipasaka na unya ngadto sa Police Regional Office-7 alang sa summary hearing.

Si Supt. Rodolfo Albotra, hepe sa PIDMB, mibutyag nga samtang anaa sa gawas ang dinakpan responsibilidad kini ni Patac ug Rosal kinsa adunay direct supervision, control ug kustodiya kang Dionesia Lumantao.

Wala usab natala sa police blotter nga gi-turnover sa duha ka pulis si Lumantao ngadto sa desk officer pag-abot nila sa estasyon gikan nag-commit sa dinakpan sa Regional Trial Court Branch 55, Mandaue City.

Si Lumantao, residente sa Sitio Kalubihan, Barangay Pulpogan, Consolacion, nasikop pinaagi sa warrant of arrest sa Section 11 sa RA 9165 o Dangerous Drugs Act of 2002 nga giluwatan ni Judge Estella Alma Singco adtong Marso 2.

I-remand na unta siya ngadto sa Bureau of Jail Management and Penology apan tungod sa kakuwang sa oras gibalik kini sa police station sa dihang mihangyo kini nga mupasuso lang una sa iyang anak diha gawas sa buhatan apan paglabay sa pipila ka minuto kalit lang nawala ang suspek.

Apan matud pa sa PIDMB nga bisan “in good faith” ang pagbuhat sa pulis niini makunsiderar lang gihapon kini nga negligence. (BANAT NEWS)