Wanted pagpatay sa pag-umangkon ‘dakpan

CEBU, Philippines - Usa ka giingong parolado nga gipasanginlang miunay og pusil patay sa iyang pag-umangkon niadtong buwan sa Nobiyembre sa milabay’ng tuig nasikop sa kapolisan sa dakbayan sa Talisay niadtong Martes sa hapon diha sa ilang balay sa barangay Lawaan III.

Ang suspetsado mao si Lovewyen Cabusas, 30-anyos residente sa maong dapit suspetsado sa pag-unay og patay sa iyang pag-umangkon nga si Joseph Karl Alagabre, taga sitio Crusher sa nahisgutang barangay.

Dala nila ni SPO4 Frederick Larrobis, SPO1 Edgar Causon, SPO1 Benjamin Sabellita, SPO1 Isaias Cabuenas, SPO1 Mikie Espina, SPO1 Yvonne Illustrisimo, PO3 Benedicto Lasque, PO3 Ferdinand Pablo, PO2 Jude Enemecio ug PO1 Stephen Sefuesca ang warrant of arrest nga giluwatan ni Regional Trial Court (RTC) Judge Sylva Aguirre-Paderanga sa Branch 16 batok kang Cabusas.

Si Cabusas misibat kaniadto human sa maong hitabo apan ang kapolisan nakadawat og report nga mipauli kini diha sa ilang balay sa sitio Crusher hinungdan nga nasikop.

Napriso na  kini sa National Bilibid Prison sud sa siyam ka tuig tungod sa pagpatay og unay sa iyang uyoan apan nakagawas human tugoting makaparol. (Brenda D. Batuto/EIM)

Tindahan girakrakan

Natusak sa bala sa armas ang usa ka mini store sa Sitio Caimitohan, barangay  Labogon, sa dakbayan sa Mandaue dihang girakrakan sa duha ka armadong wala hiilhing lalaki nga nagsakay og motorsiklo alas-7 pasado ang takna sa miaging Martes sa gabii.

Swerteng way naigo sa magtiayong tag-iya sa maong tindahan nga sila si Marcial  Salonoy, 53, ug iyang asawa nga si Marilyn,  54. Ang duha daling nakahupo ug nakapasalipod sa bungbong nga semento atol sa hitabo.

Daling miikyas ang mga mamumuno  sakay sa usa ka kolor itom ug sagol puti nga motorsiklo paingon sa highway sa maong dakbayan.

Si PO1 John Butch Epile sa kapolisan sa Presinto 3 sa Mandaue City Police Office (MCPO) miingon nga human sa hitabo, nakadawat ang magtiayon og tawag sa telepono nga nibahad nga dili pa kadto mao ang ilang madawat gikan sa wa magpailang caller.

Sa gawas sa tindahan sa magtiayon maoy ilang nakaplagan ang lima ka  kabhang sa bala nga kalibre .45 nga ilang gituohan’g gikan sa armas sa mga nangrakrak.

Gisusi karon sa kapolisan kun may gikaaway ba ang maong pamilya nga posible nga maoy naghimo sa maong pagpangrakrak. (BANAT NEWS)