Prostitusyon sa Mango Avenue gisusi

CEBU, Philippines - Gi-monitor karon sa kapolisan sa dakbayan sa Sugbo ang gikatahong prostitusyon diha sa Mango Avenue tungod sa taho nga giingong may mga biktima sa bagyong Yolanda nga nagbaligya na lang sa ilang unod sa maong lugar. Apan giklaro sa hepe sa City Intelligence Branch Chief Insp. Romeo Santander nga report pa lang ang ilang nadawat ug wala pa silay kongkretong impormasyon bahin niini. Hinuon giangkon niyang dili kini layo nga mahitabo sanglit nagkinahanglan og kwarta ang mga biktima sa bagyong Yolanda.

Matud pa ni Santander nga unfair alang sa mga biktima sa Yolanda ang maong huhungihong busa iya gyud kining susihon. Apan mitug-an si Santander nga niadtong miaging tuig dunay mga na-rescue ang kapolisan nga mga menor de edad nga mga babaye nga mga prostitute apan wa kini motug-an kun biktima ba sila sa maong bagyo.

Pipila ka semana ang milabay dunay mga babaye nga na-rescue sa dakbayan sa Talisay nga gikatahong nabiktima sa usa ka retired chemist nga Amerikano ug usa ka Swedish National.

Biktima sa maong Swedish national ang duha ka menor nga na-rescue atol sa raid nga gihimo sa kapolisan sa Talisay, Anti-Cybercrime Group ug sa Regional Anti Human Trafficking Task Force 7. (/EIM)(BANAT NEWS)