160 ka bata gipangtuli gihatagan pa’g ice cream

CEBU, Philippines - Mikabat sa 160 ka bata nga nagpanuigon gikan sa diyes ngadto sa 12-anyos ang nakapahimulos sa gipahigayon nga Operation Libre’ng Tuli sa Barangay Paknaan, dakbayan sa Mandaue kagahapon.

Ang maong mga bata gipanghatagan pa kini og ice cream aron madasig sa pagpatuli atol ning bakasyon.

Si Kapitan Malaquias Soco sa Barangay Paknaan nagpasalamat sa mga doktor sa Barangay Medical Care Center ug Cebu Institute of Medicine (CIM) ug sa mga medical students nga miabag sa maong kalihukan.

Ang operation tuli sa kabataan gipasiugdahan sanglit niining bulan sa Abril hangtud sa Mayo niining tuiga panahon man sa bakasyon o wala’y klase.

Ang Philippine Red Cross nga gipangulohan ni Dr. Amour Cantillas nagpahigayon usab sa blood donation campaign ug daghan sa mga molupyo sa Barangay Paknaan midonar sa ilang dugo.

Si Kapitan Soco miingon nga ang mibulontaryo sa pagdonar og dugo makapahimulos unya og libre’ng dugo ug libre nga screening sa higayon nga sila manginahanglan og dugo sa umaabot nga panahon. (BANAT NEWS)