Tulisan sa PUJ dakpan dayon sa mga polis

CEBU, Philippines - Nasikop dayon sa mga sakop sa Carbon Police Station ang usa ka lalaki nga giingon nga maoy mitulis sa duha ka pasahero sa usa ka PUJ sa dalan Progreso, Barangay Ermita, dakbayan sa Sugbo kagahapon sa hapon.

Ang nadakpan mao ang 30-anyos nga si Abu Bakr Batu, alyas Abu, nagpuyo sa Sitio Bato, Ermita.

Si Batu maoy gitumbok nga mitulis ni Chiena Nuñez, 21, lumad nga taga Dipolog ug ni Aljun Romero, 20, nga taga Cabantan, Barangay Luz.

Si PO3 Antonio Tejero miingon nga samtang nagpatrolya sila ilang nadungog ang babaye ug lalaki nga nagsinggit og tabang.

Nasuta sa mga polis nga ang misinggit biktima sa tulis ug ilang nasigpatan ang suspetsado nga nagdagan mao nga ilang gigukod  ug nadakpan.

Ang dinakpan nasakmitan pa og kalibre .38 nga revolver nga may duha ka bala. Ang duha ka cherry mobile nga cellphone sa mga biktima nasakmit pagbalik.

Matud pa ni PO3 Tejero nga ang mga biktima sakay sa PUJ nga rota 03L ug gitiunan sila’g kutsilyo sa suspetsado ug gihulga nga dunggabon kun dili ihatag ang selpon.  (BANAT NEWS)