Ika-4 nga “most wanted” nadakpan

CEBU, Philippines - Nadakpan didto sa lungsod sa Moalboal ang giila nga ika-upat nga labing pinangita nga kriminal dinhi sa dakbayan sa Sugbo.

Si Troy Comaling, 22, nag-atubang og kaso nga murder nga pending pa sa Regional Trial Court (RTC) Branch-19, nasikop sa hiniusa nga team sa kapolisan sa Regional Intelligence Division (RID) ug Cebu City police kaniadtong Sabado sa gabii.

Ang kapolisan nakadawat og kasayuran nga ang wanted nga si Comaling nasigpatan didto sa Moalboal mao nga miadto ang mga polis. Nasikop si Comaling human sa mga usa ka semana nga pagpaniid.

Ang pagdakop ni Comaling gipasikad sa warrant of arrest nga giluwatan ni  RTC Judge Wilfredo Navarro.  Pag-abot sa kapolisan sa Moalboal mga alas 11 sa gabii kaniadto’ng Sabado naabtan nila nga si Comaling natulog hinungdan nga sayon ra kini nga nasikop ug wala makapakita og pagsukol.

Anaa karon si Comaling sa Cebu City Police Office (CCPO) stockade ug itugyan siya ni Judge Navarro karong adlawa.

Sigun sa report nga adunay gitagana nga P150 mil nga premyo sa makadakop ni Comaling nga idlas ug nagtago-tago sulod na sa tulo ka tuig human makapatay.  (BANAT NEWS)