Multa minus ra bisan daghan ang dakponon

CEBU, Philippines - Ang bayad sa mga motorista nga mo-parking sa ilang sakyanan daplin sa mga karsada nagpabilin nga maoy gisaligan sa City Traffic Operations Management (CITOM) nga labing dako nila nga koleksyon, ug dili ang multa sa madakpan’g mga draybers.

Kun estrikto lang unta nga manakop ang mga traffic enforcers dinhi sa dakbayan sa Sugbo,mosangpot pa kini nga mahadlok na ang mga drayber sa paghimo og abuso sa pagmaneho og sakyanan, unya mosaka pa ang koleksyon gikan sa multa.

Ang Parking Ordinance sa dakbayan nagtugot nga kolektahan og P20 ang mga motorista sa mata’g oras nila nga pag-parking sa ilang sakyanan sa mga “designated parking areas.”

Gihulagway sa uban nga kun ang mga enforcers mopatuman lang g’yud sa ordinansa mas daku pa ang ilang koleksyon kay daghan kaayo nga mga badlongon nga drayber ug duna’y ubang multa nga moabot og P1,000.

Ang mga drayber sa sakyanan nga masakpan nga anaa sulod sa gitawag og “Junction Box” atol nga Go signal na sa pikas karsada, dakpon ug multahan og usa ka libo ka pesos apan wala usab kini ipatuman.

Si Joy Tumulak nga maoy operations chief sa CITOM miingon nga tingali og busy lang ang mga traffic enforcers nga nagdumala sa trapiko mao nga dili na sila makapanakop sa mga drayber nga makalapas sa balaod sa tukma nga pag-drive.

Dinhi sa dakbayan sa Sugbo, komon kaayo nga makita ang mga drayber nga magpaugat nga anha mag-standby sa mga “No Stopping” area apan ang ubang CITOM enforcer dili manakop kanila.

Adunay sugyot nga kadtong mga traffic enforcer nga dili manakop sa mga drayber nga nagpabadlong angay’ng taktakon sa ilang katungdanan ug ilisan sila og mga kugihan. (BANAT NEWS)