Mora’g dugo miagas sa kanal

CEBU, Philippines - Nagubot ug nabalaka kaayo ang mga lumolupyo sa Sitio Apro, Barangay Ibo, dakbayan sa Lapu-Lapu human migawas didto sa ilang dapit ang kolor pula nga kemikal gikan sa kanal nga konektado ngadto sa mga locators sa Mactan Export Processing Zone (MEPZ).

Matud ni Dencio Butal ug Liza Bermodes, mga molupyo sa Sitio Apro nga una’ng higayon pa kini nila nga nasinati ang paglugwa sa kolor pula ug dark yellow nga kimikal sa kanal nga konektado sa MEPZ.

Si Butal miingon nga isip usa ka mananagat nakit-an niya nga layo kaayo og giabtan ang maong mga kemikal nga ingon sa dugo nga mibanaw ug nahadlok ang katawhan nga makadaut ug makapatay kini sa mga isda.

Samtang si Bermodes nga aduna’y anak-masuso nabalaka usab kay anaa ilawom sa iyang gipuy-an mag-agi ang kanal nga gigawasan sa maong kemikal.

Ang ubang molupyo nakabatyag nga adunay dili maayo nga baho nga mogawas sa kanal inig kagabii diin nabalaka sila nga makadaut kini sa ilang panglawas.

Si Ibo Barangay Kapitan Mary Jane Cahilog mipadayag nga kanunay sila’ng adunay kalihukan nga manglimpiyo sa kabaybayonan apan bag-o lang kini nga problema nga nasinati sa mga molupyo.

Nahukman ni Cahilog nga ipadangat niya saPEZA Technical Committee ang problema aron ang mga sakop sa monitoring team nga maoy nag-monitor sa mga kemikal nga mogawas gikan sa mga locators sulod sa MEPZ.

Kun masuta nga makadaut ang maong kemikal nga matud pa gikan sa mga kompaniya sa MEPZ ang barangay kapitan miingon nga posible’ng modangop siya sa legal nga paagi. (BANAT NEWS)