Duha patay, pito angol sa aksidente sa karsada
CEBU, Philippines - Patay ang duha ka trabahante sa casino ug angol ang usa human sila mabanggai sa usa ka awto nga gikatahong hubog ang drayber niini samtang nagsakay sila og motor sa Salinas Drive, barangay Apas sa dakbayan sa Sugbo pasado alas 6:00 kagahapon sa buntag.
Ang namatay naila nga sila si Joselito Lopez, taga Ponce Capitol Hills, barangay Capitol sa dakbayan sa Sugbo ug si Gaudioso Bontilao, taga Balamban, ang duha mga attendant sa slot machine sa casino sa Philippine Amusement and Gaming Corporation (PAGCOR).
Samtang angol si Danny Vale, 37, taga sitio Kalubihan, barangay Kalunasan sa dakbayan sa Sugbo. Samtang ang suspek naila nga si Gerald dela Cruz, 28, taga Pahak, Lapu-Lapu City. Base sa imbestigasyon nga ang suspetsado nagdrayeb sa usa ka Honda Civic nga may plate number YGX 365 samtang ang mga biktima nagsakay sa usa ka Honda wave nga motor.
Sumala pa nga nawad-an og kontrol ang drayber niini nga si dela Cruz, nga gikatahong nakatagpilaw.Samtang ang duha gikatahong padulong na unta mouli sa ilaha gidaro sa maong awto.
Samtang upat usab ang nangaangol apil ang usa ka ginang nga maayong pagkabagnos sa karsada sa managlahing aksidente sa kadalanan sa dakbayan sa Toledo ug pulos nangalandig sa Toledo City District Hospital.
Si Cindy Claire Climaco Ramas, 20, taga sitio Apid, barangay Cantabaco sa maong siyudad nakaangkon og bali sa lawas ug samad sa kalawasan human madagit sa naghaguros nga mini bus nga nagtangag og plaka ngaGWY-248 nga gimaneho ni Felix Villarmea Cabaluna, 33, barangay Poog,Toledo.
Sa pakighinabi sa Banat News kang PO3 Celso Gako sa Traffic Division sa Toledo City Police Station, mao pay pagkanaog sa gisakyang jeepney ang biktima kauban ang 2-anyos niining anak dihang natapsingan kini sa naghaguros nga mini bus. Ang ginang gidala sa Toledo City Hospital.
Samtang angol usab sila si Ricky Alison Licera, 28, drayber sa motor ug ang angkas nga sila si Flynn James Fontino Guisol , 20, ug Junrey Cabanto Yting, 24, dihang mibuto ang ligid sa gisakyan nilang motorsiklo diha sa barangay Dumlog siyudad sa Toledo kagahapong sa buntag. Ang tulo gikan pa sa lungsod sa Asturias paingon na untang mopauli dihang nibuto ang ligid ug nangalamba sila sa dalan. (BANAT NEWS)
- Latest
