Sweldo sa JO sa Mandaue usbawan

CEBU, Philippines - Gikan sa P165 nga sweldo matag adlaw, ang mga job order (JO) nga kawani sa dakbayan sa Mandaue magdawat na unya og P300 nga sweldo matag adlaw.

Si Konsehal Diosdado Suico, chairman sa committee on budget and appropriation sa konseho sa siyudad, miingon nga mo-epekto ang pag-usbaw sa suholan sa mga JO ug clean and green sugod kaniadtong Abril 1.

Ang konseho sa Mandaue mipalabang og resolusyon kabahin sa pagpausbaw sa suholan sa maong mga kawani.

Matud pa ni Konsehal Suico nga ang nagpadayon nga pag-usbaw sa presyo sa mga nag-unang palaliton karong panahona maoy nakaaghat kanila sa konseho sa paghukom nga usbawan ang inadlaw nga sweldo sa maong mga kawani.

Dugang pa ni Konsehal Suico nga si Mayor Jonas Cortes mihangop usab sa maong tinguha sa konseho nga pagpausbaw sa sweldo sa mga JO ug mga clean and green nga mga kawani. (/BDB)(BANAT NEWS)