Wala pa masweldohi

CEBU, Philippines - Mga job order (JO) nga kawani sa Green Valley Program (GVP) sa dakbayan sa Talisay wala pa makadawat sa ilang sweldo hangtud karon hinungdan  nga sila nagbagulbol.

Ang maong mga JO giingong magdawat lang og P245 nga sweldo matag adlaw diin gitugotan sila nga makatrabaho sulod sa 10 lang ka adlaw. Si Talisay City Public Information Officer (PIO) Vincie Monterde nagkanayon nga ang maong mga JO ubos kini sa “cash for work program” sa Department of Social Welfare and Development.

Matud ni Monterde nga ang DSWD-regional office maoy mosweldo sa nahisgutang JO’s hinungdan nga maghuwat pa sila tungod kay daghan pa ang agian nga proseso.

Gawas sa daghang proseso nga agian dili lang ang siyudad sa Talisay ang gihatagan og “cash for work program” sa DSWD kondili lakip na ang ubang mga lugar.

Gibutyag ni Monterde nga 900 ka Talisaynon ang nakabenepisyo sa maong programa sa DSWD.

Hinuon giandam na sa social welfare officer sa Talisay ang payroll sa mga JO ug napirmahan na usab ang Memorandum of Agreement (MOA) tali sa DSWD ug Talisay ug ang budget na lang gikan sa DSWD ang gihuwat aron mahatagan na ang mga JO sa ilang sweldo. (/RUB)(BANAT NEWS)