14-anyos mitug-ang gilugos human namabdos

CEBU, Philippines - Nabisto ang pagpanglugos sa usa ka 14-anyos nga dalagita human kini namabdos paglabay og unom ka buwan.

Ang biktima inubanan sa iyang inahan mireklamo sa Women and Children Protection Desk (WCPD) sa Talisay City Police Station batok sa usa ka construction worker lumad nga taga Mindanao ug nagpuyo sa barangay Poblacion, dakbayan sa Talisay. Ang biktima misumbong kang PO3 Violeta Godinez nga gilugos siya sa suspek niadto pang buwan sa Oktubre sa milabay’ng tuig diha sa boarding house sa suspetsado sa barangay Poblacion. Matud pa sa dalagita, nga textmate niini ang suspek sukad pa niadtong buwan sa Septiyembre, 2013 ug pinaagi usab sa text nagkasabot silang magkita diha sa plaza sa barangay Poblacion ug nagsuroy-suroy sila sa lugar.

Gibutyag sa biktima nga gihagad siya sa suspetsado nga mouban ngadto sa iyang boarding house tungod kay duna kini kuhaon. Matud usab sa biktima nga namalibad siya apan gipugos siya sa suspetsado ug mipasalig nga dali lang kaayo sila hinungdan nga miuban na lang siya sa suspetsado apan didto gilugos kini sa suspek ug gibaharang patyon kun mosumbong.

Gibutyag sa biktima nga human siya lugosa dali siyang nagsul-ob sa iyang sapot sa kahadlok ug giingnan siya sa suspetsado nga dili pasabaon ug hatagan siya og P200 apan daling mibiya ang bata ug wala na mamati sa gisulti sa suspetsado.

Si Godinez nga nahinabi sa Banat News kagahapon nagkanayon nga ang inahan sa biktima mao nay nakabantay nga midako ang tiyan sa anak maong iyaha kining gisukit-sukit ug diha na kini mitug-an sa iyang gidangatan.

  Matud ni Godinez nga ang inahan sa biktima tagsa lang mouli sa ilang balay tungod kay nanarbaho kini isip usa ka katabang ngadto sa dakbayan sa Lapu-Lapu ug ang biktima mahadlok nga mosumbong ngadto sa iyang amahan.  (BANAT NEWS)