P1M Shabu nasakmit

CEBU, Philippines - Mokabat sa kapin usa ka milyon ka pesos nga kantidad sa gidudahang shabu ang nasakmit gikan sa magtiayon nga nadakpan atol sa buybust operation sa kapolisan sa Zone Lato, Kalawisan, dakbayan sa Lapu-Lapu kagahapon sa kaadlawon.

Ang nasikop mao si Reynaldo Layao Mabulis aka "Totik", 44, ug ang asawa niining si Elvira Berame Mabulis, 46, pulos residente sa Labangon, Cebu City. Nakuha gikan sa duha ang usa ka medium pack nga gituohang shabu nga mobalor og P120 mil atol sa buy-bust ug ang boodle money nga balor P55 mil. Sa pagkasikop sa magtiayon laing duha ka dagkong putos sa gituohang shabu nga mokantidad og P960 mil ang nasakmit gikan kanila, gibanabanang mokabat ang tanan og P1,080,000.

Matud pa ni Lapu-Lapu City Police Office, officer in-charge Senior Superintendent Armando Radoc nakadawat siya og text message gikan sa usa ka concerned citizen maoy hinungdan nga mihimo sila og surveillance. Si CAIDSOTF chief, Senior Inspector Rogelio Pineda Jr. miingon nga sud sa upat ka adlaw nilang gipanid-an ang duha nga gihulagway nilang level two drug pushers nga nag-operate sa dakbayan sa Lapu-Lapu ug makabaligya og 150 gramos ngadto sa 200 gramos matag semana. Ang buy-bust operation natigayon diha sa Zone Lato, Kalawisan dakbayan sa Lapu-Lapu, ang mga suspek luwan sa usa ka taksi. Mapasalamaton si SSupt. Radoc sa kooperasyon sa komunidad nga maoy mihatag og impormasyon kaniya. Samtang wala mohatag og mga pamahayag ang magtiayong Mabulis kalabot sa ilang pagkasikop sa kaso sa illegal nga drugas.

Sa laing bahin, nasikop usab sa mga sakop sa City Intelligence Branch ug City Anti Illegal Drugs Special Operations Task Group ang tulo ka lalaki sa buy-bust operation sa usa ka kubol-kubol sa sitio Saint Michael sa barangay Inayawan pasado alas 11:00 sa miaging gabii.

Ang nasikop mao sila si Roderick Casas, 25, molupyo sa barangay Inayawan sa dakbayan sa Sugbo nga subject sa buy-bust operation ug sila si Jeffrey Abarquez, 23, ug Billy Joel Rabadon, 20. Si Senior Insp. Eunil Avergonzado sa usa ka press conference miingon nga si Casas nasikop tungod sa usa ka concerned citizen nga nagpunay og tawag sa iyang buhatan ug sa CIB. Human nasuta nga positibo nga namaligya og drugas ang suspek gipahigayon dayon ang joint operation sa CIB ug CAIDSTOG hinungdan sa pagkasikop sa mga suspek.

Matud pa gibaligyaan sa suspek ang usa ka police poseur buyer og usa ka pakete nga shabu  hinungdan nga gidakop kini, nakuha gikan niya ang 20 ka pakete nga shabu nga mobalor og P4 mil.

Samtang gisignit sab sila si Abarquez ug Rabadon human sila naaktohan nga nagsuyop og shabu sulod sa kubol-kubol diin nasikop si Casas. Nakuhaan ang duha og mga kagamitan sa pagsuyop og drugas samtang si Rabadon nakuhaan sab og.357 nga revolver.  (BANAT NEWS)