92 pamilya nasunogan

CEBU, Philippines - Naugdaw sa sunog ang panimalay sa 92 ka pamilya kagahapon sa kaadlawon diha sa sitio Tondo, barangay Tingob, dakbayan sa Mandaue.

Ang maong sunog milungtad og 15- minutos una pa nakontrolar sa kabomberohan apan gilamoy niini ang 30 ka panimalay.

Ang mga nasunogan gipahimutang karon  sa Tingob National High School ug gihatagan na og pagkaon sa City Social Welfare and Development (CSWD) nga gipangulohan ni Violita Cabada.

Si SFO1 Julius Lloa, imbestigador sa Bureau of Fire Protection (BFP) sa dakbayan sa Mandaue miingon nga pulos ginama sa light materials ang nasunog nga panimalay hinungdan nga gipaubos sa Task Force Alpha (TFA) ni Senior Inspector Joel Abarquez.

Migawas sa imbestigasyon nga ang kalayo nagsugod sa abandonadong balay nga gipanag-iya sa usa ka Noel Hopia ug dali kining mitapon sa mga kasikbit nga mga panimalay.

Mokabat sa P300,000 ang danyos sa sunog apan walay naangol o kinabuhing nakalas. Gisusi karon kun nganong misilaob ang balay nga walay kuryente ug wa say nagpuyo sa maong balay. (BANAT NEWS)