Road widening lisud pa mapatuman

CEBU, Philippines -  Wala pa’y kasiguroan nga kahatagan dayon og katumanan ang awhag sa City Traffic Operations Management (CITOM) nga mapalapdan ang dalan Tres de Abril sa Barangay Labangon lahus na sa Barangay Punta Princesa.

Ang laing awhag sa CITOM Board mao nga palapdan unta sa Department of Public Works and Highways (DPWH) ang Governor Mariano Cuenco Avenue, ang karsada nga naila nga Banilad-Talamban road.

Gitan-aw sa mga sakop sa CITOM Board nga kinahanglan g’yud nga mapalapdan ang mao nga mga karsada aron pag-abag nga kahatagan og sulbad ang problema sa trapiko sa mao nga mga dapit.

Gituohan nga dili dayon kini mapatuman tungod kay ang pagpalapad sa karsada nagkinahanglan og milyon-milyon ka pesos nga kantidad aron ibayad sa mga tag-iya sa kayutaan nga maapektahan sa road widening project.

Matud sa mga opisyal sa CITOM nga angay na g’yud nga palapdan ang mga karsada kay nagkadaghan ang mga sakyanan nga nagdagan karon dinhi sa dakbayan.

Ang rekord sa Land Transportation Office (LTO) nagpakita nga mata’g tuig adunay labing minus 20,000 ka sakyanan nga madugang dinhi sa Central Visayas ug ang kadaghanan niini ania sa dakbayan sa Sugbo. (BANAT NEWS)