Upat ang adik sa mga kawani sa Guadalupe
CEBU, Philippines - Upat na usab ka kawani sa Barangay Guadalupe ang namatud-an nga mohingos diay og gidili nga matang sa ilegal nga drugas.
Ang upat ka barangay workers napositibo sila sa kinalit nga drugtest nga gipahigayon sa mga sakop sa City Office for Substance Abuse Prevention (COSAP).
Si Kapitan Michael Gacasan maoy miawhag ni COSAP chief Alice Utlang nga himoan og surprise drugtest ang iyang kapin sa 100 ka kawani sa barangay.
Matud ni Dr. Utlang nga sa upat ka kawani sa Guadalupe nga napositibo sa drugtest adunay tanod, drayber ug garbage collector ug loaders.
Ang mga opisyal sa Guadalupe magtigum pa aron sabotan kun unsa’y himoon nila sa mga kawani nga nasayran nga mogamit diay og shabu.
Matud ni Dr. Utlang nga paspasan nila ang pagpahigayon og drugtest sa mga kawani sa barangay apan anaa ra sa ilang mga opisyal ang paghukom unsay buhaton sa mapositibo.
Nakahan-ay na sa opisina sa COSAP kun unsa nga mga barangay ang himoan nila og surprise drugtest ang mga kawani apil ang mga opisyal.
Sukad ipahigayon sa COSAP ang drugtest wala pa g’yuy bisan usa ka opisyal nga namatud-an nga tiggamitan og shabu.
Ang tanang opisyal sa dakbayan apil na si Mayor Michael Rama nagpa-drugtest usab apan sila’ng tanan negatibo sa ilegal nga drugas. (BANAT NEWS)
- Latest
