Hearing bahin sa “illegal tree cutting sa Talisay City sugdan sunod semana
CEBU, Philippines - Gikatakda karong Abril 7 moatubang ang walo ka mga tawo nga naglakip sa igsuon ni Talisay City Mayor Johnny De Los Reyes sa DENR-7 alang na sa himoong administrative hearing kalabot sa pasangil nga pagpamutol nila og mga kahoy sa Osmeña Reforestration Project sa DENR-7 sa barangay Manipis, Talisay City.
Ang tigpamaba sa DENR-7 nga si Ed Llamedo miingon nga tulo ka balaod ang ilang gitan-aw nga posibleng nalapas nila ni Eduardo Abalo, Antonio Javerina, Roger Bajo, Virgilio Bastida, Marciano Silva, Roldan Basamayor ug Joel De Los Reyes.
Ang maong mga balaod gilangkuban sa section 77 sa Presidential Decree 705 o Forestry Code of the Philippines, Executive Order no. 23 o ang moratorium of tree -cutting ug ang ikatulo mao ang wa nila pagpa-rehistro diha sa DENR sa chainsaw nga gigamit sa pagpamutol.
Dugang pa ni Llamedo nga kun di motambong ang mga nahisgutang mga tawo di usab mahatagan og merito ang ilang eksplinasyon mag-atubang sila og tukmang silot.
Gitataw usab sa ahensiya nga aduna silay mga saksi nga makapamatuod sa gihimong illegal logging sa maong lugar ug gani adunay mga local officials sa Talisay City nga andam mahimong witness kun ma-file na ang kaso.
Tun-an sab nila ang pagpahuwam og chainsaw sa mayor kun aduna ba kini tulubagon sa maong panghitabo human unya sa hearing sa kaso.
Kusganon hinuong gihimakak sa kampo sa mayor ang maong mga alegasyon.
Nasayran nga gikan sa tuig 2011 hangtod sa Disyembre 2013 aduna nay 30 ka forestry related cases nga gipasaka ang DENR ug padayon ang ilang paghusay sa maong mga kaso. /EIM (BANAT NEWS)
- Latest
