Nagpailang NBI ug 11 ka tawo nabuy-bust
CEBU, Philippines - Nasikop sa kapolisan ang 12 ka mga lalaki lakip na sa usa ka lalaki nga nagpailang National Bureau of Investigation agent sa usa ka buy-bust operation nga gipahigayon sa City Intelligence Branch (CIB) ug City Anti Illegal Drugs Special Operations Task Group (CAIDSOTG) sa alas 2:00 kagahapon sa kaadlawon diha sa sitio CRCI sa barangay Apas sa dakbayan sa Sugbo.
Si Chief Insp. Romeo Santander nga nahinabi sa mga tigbalita miingon nga subject sa maong buy-bust si Regil Paragile kinsa giingong notadong drug pusher sa lugar apan nakaikyas.
Nasikop hinuon sa kapolisan ang lima ka lalaki nga gikatahong ilang naaktohan nga nagsuyop og shabu sa balay ni Paragile nga naglakip sa usa ka Roel Placides, kinsa dali dayong nagpaila nga sakop sa NBI.
Lakip sa nasikop mao sila si Jumar Caminade, Rodel Paragile, Elgen Samson, Zosimo Milagrosa. Nakuha diha sa balay ni Paragile ang usa ka kalibre 45 pistola ug .38 rebolber ug mga bala ingon man 52 ka paketeng gidudahang shabu nga tag P300 ang matag putos, syringes, drug paraphernalia.
Apan sumala pa ni Santander nga sa ilang pag-verify sa buhatan sa NBI, wa nila angkonang sakop si Placides, gitun-an karon sa NBI ang posibleng pagpasaka og kaso batok kaniya.
Usa ka identification card ang nakuha kang Placides nga expired na niadto pang tuig 1999 ug nakabutang sa maong ID nga intelligence operative kini. Lakip usab sa giapil og dakop ang mga naghantak sa lugar nga sila si Viner Pugoy, William Orge, Jerryl Manulong, Jewel Pialago, Jason Adolfo, Eddie Milagrosa ug usa ka Jorjio. Pasakaan sila og kaso base sa kalapasan nga ilang nabuhat. Samtang pasakaan usab og kasong kalapasan sa Section 5 sa Art. 2 sa RA 9165 si Paragile. /EIM (BANAT NEWS)
- Latest
