Davide gidayeg sa mayor sa Dumanjug

CEBU, Philippines - Gikalipay ni Dumanjug Mayor Nelson Garcia ang desisyon ni Gobernador Hilario Davide III nga tun-an usa ang rekomendasyon sa Cebu Provincial Board nga pahamtangan siya og duha ka buwan nga preventive suspension.

Matud ni Mayor Garcia nga pinaagi sa gipakitang lihok sa gobernador siya nagtuo nga si Davide mismo nahibawo nga adunay depekto ang rekomendasyon pagpasuspenso kaniya kay ang gobernador usa ka abogado ug nasayod sa unsa’y balaod.

Dugang sa mayor nga dako siya og respeto ni Davide tungod kay iyang nasuta nga wala g’yud kini mamolitika ug mas gipatigbabaw niini ang balaod.

Malaumon ang mayor sa Dumanjug nga mahatagan siya og higayon sa Provincial Board nga maka-esplikar sa iyang bahin kalabot sa reklamo nga gipasangil sa iyang bise mayor aron makadepensa siya sa iyang kaugalingon.

Si Dumanjug Vice Mayor Efrain Gica mireklamo batok ni Mayor Garcia tungod sa pagtudlo niini og secretarya sa Sanguniang Panglungsod nga katungdanan na sa bise mayor.  (BANAT NEWS)