Nanganta sa videokehan gikasuyaan
CEBU, Philippines - Duha ka tawo nga nagsigi’g kanta sa videokehan didto sa Barangay Canduman, Mandaue lapas sa tunga’ng gabii kaniadtong Sabado ang gitabangan og kulata sa mga tawo nga gituohan nga nasuya kanila.
Sila si Eric Asignar, 27, taga Barangay Talamban, dakbayan sa Sugbo ug Jesson Villamor, 29, taga Barangay Canduman, pareho nga nakaangkon og mga bun-og sa kalawasan diha’ng mireport sila sa hitabo sa kapolisan.
Matud pa ni PO1 Arnold Villacampo nga sila si Asignar ug Villamor sayo pa kaayo nga misulod sa videokehan ug nag-inom og beer samtang mikanta sa ilang mga paborito nga kanta.
Si Villacampo nga sakop sa Presinto 6 sa Mandaue City Police Office (MCPO) miingon nga naabtan na lang og ala una sa kaadlawon nagsigi pa’g kanta ang duha.
Ang mga wala hiilhi nga lalaki kalit misulod sa imnanan ug mipunit sa mga plastik nga lingkoranan ug gibunal kanila ni Asignar ug Villamor. Dunay uban sa mga lalaki nga migamit sa ilang kinumo. (BANAT NEWS)
- Latest
