Mag-exhibition sa karsada dakpon

CEBU, Philippines - Ang mga opisyal sa dakbayan sa Lapu-Lapu magmugna og ordinansa nga magdili sa mga bisikleta, long boarding ug roller blade nga gamiton sa paghimo’g exhibition sa kadalanan sa siyudad.

Matud ni Lapu-Lapu City Councilor Harry "Don" Radaza nga angay’ng estriktohon na ang pagdili sa mga exhibition sa karsada kay ang dakbayan magmugna na man og skate park nga adto ipahimutang sa Hoopsdome sa Barangay Gun-ob.

Ang batan-ong Radaza miingon nga dilikado kaayo ang pagduwa ug ang pagpasundayag og exhibition sa karsada.

Pakigtagboan ni Radaza ang kadagkoan sa City Traffic Management System kon CTMS ug ang kapolisan sa dili pa niya sugdan ang paghimo sa ordinansa.

Ang skate park nga international standard ang gidak-on gihimo sa Lapu-Lapu alang sa mga mahiligon sa long boarding, roler blade ug bisikleta aron dunay lugar sila nga kaduwaan ug dili na sa karsada.   (BANAT NEWS)