Talisay budget officer paesplikahon

CEBU, Philippines - Ang budget officer sa dakbayan sa Talisay pangayoan og kwentada kun pila ang iyang nagasto sa pagsalmot sa mga tinun-an sa Sinulog sa Kabataan sa Lalawigan kaniadtong Enero.

Matud ni Talisay City Councilor Aldin Diaz nga pangayoan niya og liquidation report si Budget Officer Edgar Mabunay ug sutaon nganong gigamit niya ang P300 mil nga kabahin sa premyo sa mga tinun-an sa ilang pagdaug.

Si Konsehal Diaz maoy representante ni Mayor Johnny V. De los Reyes sa tourism development council.

Ang mga tinun-an sa Talisay nakapremyo og P400 mil dihang nadeklarar sila nga 4th placer sa Sinulog ritual showdown sa Sinulog sa Kabataan sa Lalawigan.

Matud ni Diaz nga kinahanglang ipasabot ni Mabunay ngadto sa konseho kabahin sa reklamo sa mga estudyante nga wala ihatag kanila ang ilang premyo.

Ang kagamhanan sa Talisay migahin og P2 milyones nga budget alang sa pagsalmot sa ilang mga tinun-an sa Sinulog sa Kabataan.

Giangkon ni Mabunay nga gigamit niya ang P300 mil sa premyo kay gibayad sa galastohan sama sa bayranan sa drum and bugle, pagkaon ug sakyanan nga gisakyan sa mga props ug uban pa alang sa Sinulog Mardi Gras.

Ang nahibiling P100 mil sa premyo gigasto kini sa victory party sa miyembro sa school contingents.

Matud ni Diaz nga si Mabunay daghan og angay’ng ipasabot kabahin sa gasto pagsalmot sa kabataan sa Sinulog ug sa kapakyas pagbayad sa P1.2 milyon ngadto sa organizer sa Kasadya sa Talisay sa milabay’ng pista sa siyudad kaniadtong Oktubre.  (BANAT NEWS)