Drug Test sa punta princesa lima ka kawani napositibo
CEBU, Philippines - Bisan adlaw’ng Sabado kagahapon apan wala’y hunong ang mga sakop sa City Office for Substance Abuse Prevention (COSAP) pag-ila kinsa ang mga adik nga kawani sa barangay.
Tuod, lima ka kawani sa Barangay Punta Princesa ang namatud-an nga mga adik ug hayan taktakon sa ilang katungdanan.
Wala hinoon itug-an ni Kapitan Jose Navarro ang ngalan sa mga adik nga pulos ordinaryo lang nga mga kawani sa barangay.
Matud ni Navarro nga magtigum sila’ng mga sakop sa Barangay Council ug sabotan unsa’y ilang himoon niini’ng mga kawani nga adik sa illegal nga drugas.
Si Navarro maoy miawhag sa COSAP nga gipangulohan ni Dr. Alice Utlang nga himoan og drug test ang iyang mga kawani, apil ang tanang konsehal.
Matud ni Utlang nga moabot na og dul-an sa 50 ka kawani sa barangay nga nahimoan nila og drug test ang namatud-an nga sila tiggamitan og shabu.
Kaniadtong Biyernes, duha ka kawani sa Barangay Lahug napositibo usab sa paggamit og ilegal nga drugas.
Sagad sa mga mogamit og shabu mao ang mga basurero sa barangay kay matud ni Dr. Utlang gituyo kini sa mga kawani aron dili nila mapanimahoan ang kabaho sa basura. (BANAT NEWS)
- Latest
