Sunog miulbo sa barko ug apartment

CEBU, Philippines - Duha ka sunog ang miulbo kagahapon apil na sa usa ka barko nga nag-angkorahe didto sa Danao ug laing sunog nga miulbo usab sa apartment sa Barangay Cubacub, dakbayan sa Mandaue. Si FO2 Erwin Castaneda, imbestigador sa Danao City Fire Station, miingon nga alas 10:45 sa buntag kagahapon nakadawat sila og alarma sa sunog nga miulbo sa M/V Unilink 1, barko sa Republic Shipping Lines.

Matud ni Castaneda nga ang barko nagpahigayon og annual drydocking aron ayuhon ug pintalan apan ang baga gikan sa welding rod didto mitugpa sa mga biya nga asite nga nagpasad sa luwang sa barko ug misilaob.

Ang mga tripulante nagtinabangay pagpawong sa misilaob nga kayo mao nga nahurot na pagpasirit ang walo ka fire extinguishers. Si FO2 Castaneda miingon nga dili na kaayo kusog ang kayo sa pag-abot sa mga bombero.

Walay kinabuhi nga nakalas sa mao nga pag-ulbo sa kayo sa barko ug dili kaayo daku ang kadaut nga nasinati.

Samtang laing sunog ang miulbo sa dos andanas nga apartment sa Flores Compound, Purok 1, sakop sa Barangay Cubacub kagahapon gihapon sa buntag. Ang apartment nga gipanag-iya ni Joveniano Libato hingpit gayod nga naugdaw. Gitoohan nga ang napasagdan nga kuryente maoy nakaingon sa kalit nga pag-ulbo sa kayo nga miugdaw sa karaan nga apartment. Ang danyos sa apartment gibana-bana lang nga P100,000 ug walay naangol o nakalas nga kinabuhi.  (BANAT NEWS)