NPA hilom sa ilang anibersaryo — Centcom

CEBU, Philippines -  Way na-monitor nga kalihokan sa New People’s Army ang AFP-Central Command atol sa kasaulogan sa ika-45 ka tuig nga katukoran sa maong pundok kagahapong adlawa.

Si Lt. Jim Alagao, ang tigpamaba sa CentCom sa usa ka text message dinhi sa Banat News miingon nga “ wala pa man kaayo kalihukan sa atoang (area of responsibility) AOR.”

Giisa sa CentCom ngadto sa red alert status ang tanang lugar nga sakop sa area of responsibility niini tungod sa kasaulogan sa ika-45 nga anibersaryo sa NPA.

Lakip sa gipangandaman sa Central Command mao ang posibleng pagpanimalos sa NPA tungod sa pagkasikop sa chairman sa Communist Party of the Philippines ug sa Secretary General niini nga magtiayong Benito ug Wilma Tiamzon.

Ang Police Regional Office 7 miisa sab sa alert status niadtong petsa 28 sa Marso gikan sa heightened alert ngadto sa full alert sa samang rason.

Sa website sa CPP mimando sila sa ilang mga sakop sa paghimo og 21-gun salute sa udtong tutok alang niadtong mga kauban nilang nakalas ug hingusgan pa ang opensiba.

Apan matud pa sa tigpamaba sa AFP Lieutenant Colonel Ramon Zagala nga nahinabi sa mga tigbalita sa kaulohan  nga ang mga rebelde wa na magsubay sa ilang ideolohiya ug karon nahimo na lang nga criminal gangs  kay mangilkil na man sila sa mga tawo ug mga kompanya.

Nanawagan ang AFP sa publiko nga di tagdon ang mga propaganda sa NPA nunot sa mga krimen nga ilang nahimo.

Matud pa ni Zagala nga nahimo na lang nga criminal group ang CPP-NPA tungod sa extortion na nga ilang gihimo sa mga politiko ug mga negosyanti.  (BANAT NEWS)