Nagpailang “NBI” gidakop

CEBU, Philippines - Nasikop sa kapolisan sa lungsod sa Tuburan ang usa ka lalaki nga nagmaoy sa kahubog nga misumbag sa polis ug nagpaila nga sakop sa National Bureau of Investigation kagahapon sa kaadlawon sa barangay Poblacion.

Ang nasikop naila nga si Adonis Maano alyas Niki nga molupyo sa barangay Manga sa maong lungsod.

Si PO1 Ken Sungahid, desk officer sa Tuburan nga nahinabi sa Banat News miingon nga nakadawat og text message si PO1 Maverick Bulotan nga dunay nagmaoy sa barangay Poblacion.

Busa dali kining gisusi ni Bulotan ug nasuta nga si Maano ang nagmaoy tungod sa kahubog niini, dihang nagpaila si Bulotan nga pulis ug gipakita niini sa suspek ang iyang badge giingong gibunlot kini ni Maano ug gilabay ug misulay kini sa pagsumbag sa polis apan wala kini makaigo.

Nanawag og back-up si Bulotan ug sa pag-abot nila sa lugar gi-estoryahan nila ang suspek apan nagpaila man hinuon kini nga NBI.

Dihang dakpon na unta kini mikaratil kini og dagan  apan naapsan.

Matud pa ni Sungahid nga pasakaan og kasong direct assault to persons of authority karong adlawa.  (BANAT NEWS)