Nakuryentihan sa washing machine

CEBU, Philippines - Patay nang miabot sa tambalanan ang usa ka lalaki human kini makuryentihi samtang nanglaba gamit ang washing machine diha sa barangay Poblacion lungsod sa Cordova kagahapon sa kaadlawon.

Ang namatay giilang si Gerard Catalaba, 26, dunay kapuyo ug residente sa sitio Camolinas sa maong barangay nga usa ka icemaker sa usa ka planta sa ice sa maong dapit.

Matud pa sa imbestigasyon ni PO3 Erwin Gederio sa Cordova police, ang kauban ni Catalaba nga si Brandon Asentista miingon nga alas 12:30 kagahapon sa kaadlawon iya kining namat-an nga nanglaba gamit ang washing machine.

Apan pipila ka gutlo ang milabay nadunggan niya ang siyagit ni Catalaba hinungdan nga iyaha kining gisusi pagbalik apan nakurat siya nga nagkirig-kirig na kini, dali niyang gitangtang ang gisaksak nga extension wire gikan sa plug ug daling gidala sa Mactan Doctors Hospital si Catalaba apan gideklarar kini nga patay na ug base sa nakita sa mga doktor gidudahang nakuryentihan kini tungod sa mga paso sa kalawasan.

Sa pagsusi sa kapolisan sa gigamit nga washing machine ni Catalaba, nasuta nga dunay gisi ang extension wire nga gigamit niini nga nabasa sa tubig hinungdan nga nakuryentihan.  (BANAT NEWS)