Bag-ong X-Ray sa Mactan airport

CEBU, Philippines - Ang international arrival ug departure area sa Mactan-Cebu International Airport mabutangan na og moderno nga X-Ray machines nga motabang pag-ila kinsa sa mga pasahero sa abyon ang nagdala og mga butang kontrabando.

Si Gerardo Campo, collector sa Bureau of Customs sub-port sa Mactan Airport, miingon nga dugay na kaayo nga nangandoy sila nga makaangkon og bag-o ug modernong X-Ray machines alang sa ilang international arrival ug departure areas.

Matud pa ni Campo nga sa dugay’ng panahon gimano-mano lang sa mga kawani sa Customs ang pagsusi sa mga bagahe sa pasahero nga moagi sa counter.

Iyang gipasabot nga ang mano-mano’ng sistema makapalangan sa mga pasahero apan wala sila’y mahimo kay gitahasan sila pagsiguro sa kaluwasan sa biyahe sa abyon.

Matud ni Campo nga kinahanglan nilang himoon aron walay makalusot nga kontrabando ug illegal nga drugas sa tugpahanan.

Si Cebu Customs District Collector Roberto Almadin naningkamot g’yud pag-awhag ni Customs Commissioner John Philip Sevilla nga magahinan og salapi ang pagpalit og bag-ong X-Ray machines ang Mactan airport.

Gipasalig ni Campo nga mahimo na nga operational ang maong X-Ray machines sulod sa 2nd quarter ning tuiga.

Kun magamit na ang X-Ray machines dali na lang ang pagsuta kun ang mga bagahe gisudlan ba og butang kontrabando, ilabi na ang mga armas.

Mahinumdoman nga sa milabay’ng katuigan adunay pipila ka langyaw nga nadakpan sa Mactan Airport nga gikan sa gawas sa nasud nga nagdala og illegal nga drugas.

Matud ni Campo nga pinaagi sa bag-ong X-Ray machines madali na lang nga madiskobrehan ang mga palusot sa mga highly taxable goods ug illegal nga matang sa drugas nga ipaagi sa tugpahanan. (/RUB)(BANAT NEWS)

‘