Most wanted sa danao nadakpan
CEBU, Philippines - Ang ika-unom nga “most wanted person†sa Dakbayan sa Danao nasikop sa joint operation sa lainlaing police units didto sa Barangay Poblacion, Danao kaniadtong Huwebes sa gabii.
Ang nadakpan mao si Cesar Lao, 27, nagpuyo sa Barangay Poblacion ug nag-atubang og kaso nga murder didto sa Regional Trial Court (RTC) nga nagbase sa Danao City.
Nasikop si Lao sa hiniusa nga team sa kapolisan gikan sa PNP Criminal Investigation and Detection Group (CIDG)-7, Provincial Intelligence Branch (PIB) ug Danao City Police Station.
Si Chief Inspector Rene Kyamko, CIDG-7-province chief, mibutyag nga pito na ka-tuig nga nagtago-tago si Lao human kini makapatay kaniadtong Disyembre 31, 2007 didto ra sa ilang dapit.
Matud pa nga sakop og fraternity si Lao ug may kuyog kini nga laing tawo dihang nakit-an nila ang biktima nga si Roland Mancao nga may kauban nga higala aron unta mosimba dihang ilang gipatay.
Ang report nagkanayon nga nasamdan usab ang kauban ni Mancao niadtong higayona. Gikan sa pagkahitabo sa mao nga krimen nagtago-tago na si Lao.
Atol sa operation sa kapolisan kaniadtong Huwebes sa gabii, si Lao nagtinguha pa unta nga moikyas apan wala siya magmalampuson.
Gidala si Lao sa PNP Crime Laboratory Service-7 aron mahimoan og drug test. (/RUB)(BANAT NEWS)
- Latest
