Pagbutang og CCTV sa Talisay ipadayon

CEBU, Philippines - Ang kagamhanan sa dakbayan sa Talisay nagplano sa pagpadayon sa proyekto sa milabay’ng administrasyon kabahin sa Close Circuit Television (CCTV) cameras.

Ang bag-ong hepe sa kapolisan sa dakbayan sa Talisay nga si Superintendent Reycel Carmelo Dayon kinsa misusi kagahapon sa buntag sa monitor room diha sa city hall mibutyag nga ang siyudad dunay plano sa pagpadayon sa maong proyekto.

Matud ni Dayon nga ang pagbutang og mga cameras diha sa kadalanan sa siyudad dako kaayo kining matabang sa pagsumpo sa kriminalidad tungod kay ma-monitor man ang mga badlungon nga naghimo og krimen diha sa Talisay ug gawas niini ma-monitor usab ang dagan sa trapiko.

Gibutyag ni Dayon nga dunay nag-function nga camera diha sa Tabunok apan guba ang system niini, posibleng ang service provider mapatawag kung ang maong proyekto ipadayon sa siyudad.

Matud usab sa bag-ong hepe nga ang mga busy nga junction ug accident prone area maoy angayang butangan niini ug mopadangat siya niini og rekomendasyon sa City of Talisay-Traffic Operation Development Authority (CT-TODA) sa pag-ila sa accident ug traffic prone area.

Subay niini, si Dayon nagkanayon nga ang maong proyekto kinahanglang lingkuran kini sa mayor og bise mayor aron maimplementar. Karong Lunes si Dayon gikatakdang makig-meeting sa mayor. (/EIM)(BANAT NEWS)