Pamilyang Apduhan misaway sa media

CEBU, Philippines - Gikasagmuyo sa pamilyang Apduhan ang mga migawas nga report sa media kay matud pa nila layo ra kaayo kini sa kamatuoran.

Sila mipasangil nga giingong halos bakak ang tanang mga migawas nga detalye ilabi na sa pagtawag sa ilang tinuhuan nga usa ka kulto.

Gipadayag ni Sianrez Apduhan , anak sa giilang lider sa kulto, nga si Casciano Jr., ang iyang kahiubos kay matud pa niya nobenta porsyento sa mga migawas nga balita pulos bakak.

Matud ni Sianrez di gyud makiangayon alang sa ilang pamilya ang migawas nga mga report labot sa ilang tinuhuan.

“Ganun pala yun, gusto ng media yung top stories talaga. Sabi nga nila the media itself daw is 90% “botbot” and 10% totoo,” asoy ni Sianrez.

Apan daling nakapanalipod  ang pipila  nga mga sakop sa tigbalita sa pasangil ni Sianrez.

Matud ni Futch Anthony Inso reporter sa DYHP nga di siya mouyon sa maong pamahayag tungod kay ang media mihimo og balita base usab sa mga detalye nga ihatag sa mga news sources.

Samtang human nga napasaka ang kasong serious illegal detention ug illegal possession of firearms batok kang Casciano ug sa driver niini nga si Victor Fajardo sila mipadayag nga andam nilang atubangon ang kaso.

Sigon sa pamilyang Apduhan nga bugtong makapamatuod sa nahitabo mao ang 33-anyos nga babaye nga giingong kabubut-on niini nga mopuyo sa ilang balay wa kini gipriso.

Mipirma og waiver of detention sa Provincial Prosecutor’s Office ang mga suspek ug naaprobahan ang kinse ka adlaw nga ma-detain sila sa NBI-7 samtang mag-file sa ilang counter affidavit.

Ang pamilyang Apduhan nagduda nga planted ang mga ebidensiya nga nakuha sa mga operatiba.

“It’s not true because there were several people there, the barangay, the neighbors were there, dili planted, that’s not true,” matud ni Rey Villordon sa NBI-7. (/EIM)(BANAT NEWS)