Magtiayon nakuryentihan patay

CEBU, Philippines - Patay ang magtiayon nga tigulang nga sayo’ng naligo kay motambong unta og kasal sa ilang pag-umangkon sa Barangay Cangwayan, Madredijos nga kalit lang nakuryentihan sa nahikapan nga live wire.

Ang mga biktima mao sila si Primitiva Santillan, 60, ug ang iyang bana nga si Bonifacio Santillan, 64, nga pulos nagpuyo sa nahisgutang dapit.

Si Insp. Roberto Hugo, hepe sa kapolisan sa nahisgutang lungsod miingon nga unang naligo sa banyo si Primitiva alas-5 pasado ang takna sa buntag niadtong Huwebes ug nahikapan niini ang kable sa kuryente.

Si PO3 Alesir Barangan sa Cebu Provincial Police Office, Operations Section mibutyag sa Banat News nga extension wire sa suga sa tangkal sa ilang baboyan ang gihayhayan sa sinina ni Primitiva.

Giingong dunay parte niini nga napanitan ug posibleng maoy nahikapan niini hinungdan nga nakuryentihan.

Ang bana nga si Bonifacio pagkakita sa nahitabo sa iyang asawa gikatahong dali nga midagan aron unta kini tabangan apan apil kini sa nakuryentihan.

Matud pa ni Hugo nga dali nga gitabang ang magtiayon sa ilang mga silingan ug gihatod sa Madridejos District Hospital apan tungod sa grabeng kadaut nga naangkon sa ilang kalawasan namatay gyud ang duha.

Sumala pa ni Hugo mohimo pa sila og dugang imbestigasyon pagsusi kun nganong nitapot ang livewire sa hayhayan ug gisugyot usab nila ang pagpaubos sa autopsy sa duha ka patay’ng lawas niini. (/EIM)(BANAT NEWS)