Airport sa Sta Fe panindoton

CEBU, Philippines - Gipasalig ni 4th District Congressman Benhur Salimbangon ug Pasig Lone District Congressman Roman Romulo nga ayuhon ug palamboon ang tugpahanan sa abyon didto sa Sta. Fe, Isla sa Bantayan aron magamit isip alternatibong tugpahanan sa Sugbo.

Matud ni Salimbangon nga makigtambayayong siya sa kadagkoan sa Department of Transportation and Communication (DOTC) aron mapalapdan ang runway sa Sta Fe.

Atol sa graduation sa mga tinun-an sa Philippine State College of Aeronautics (PHILSCA) sa Mactan Air Base Campus sa miaging adlaw, si Salimbangon ug Romulo maoy pinasidunggang dinapit ug midason sa plano ni PHILSCA President Bernard Ramirez nga magbutang og satellite school sa Isla sa Bantayan.

Matud pa ni Salimbangon nga nagpasalamat kaayo siya ni Gobernador Hilario "Junjun" Davide III sa planong pagpaayo sa tugpahanan sa Sta. Fe.

Gumikan niini gipasalig usab ni Salimbangon nga kun mapalapdan ang tugpahanan sa Sta. Fe makatabang kini sa pagpaluag sa air traffic sa MCIA ilabi na kun panahon sa emerhensiya.

Mas maayo usab nga sa maong tugpahanan ipahimutang ang satellite school sa PHILSCA alang sa bag-ong kurso sa flying 2nd semester sunod tuig.

Plano ni Ramirez nga ipaabot sa tunga-tungang kabisay-an ang kursong flying aron ang mga tinun-an dili na kinahanglang moadto pa sa kaulohan.

Matud pa ni Dr. Ramirez igo na kaayo ang 1.8 kilometros nga gilay-on sa runway ug pagbutang og hangar alang sa training program sa mga buot mahimo’ng piloto.

Samtang si Romulo andam nga mosuporta didto sa kongreso kalabot sa legalidad sa katukoran sa PHILSCA satellite school sa Sta. Fe.   (BANAT NEWS)