PRO7, CENTCOM mag-full alert tungod sa NPA anniversary

CEBU, Philippines - Ibutang sa full alert status sa hepe sa Police Regional Office 7 Chief Supt. Danilo Constantino ang Central Visayas agi og pangandam sa posibleng panimalos sa New People’s Army  ug sa kasaulogan sa ilang anibersaryo karong Marso 29.

Si Constantino miingon nga niadtong Lunes sa udto iyang giisa sa heightened alert status sa tibook rehiyon human sa pagkasikop sa lungsod sa Aloguinsan sa magtiayong Benito ug Wilma Tiamzon nga mga lider sa Communist Party of the Philippines.

Apan ugmang adlawa Marso 28  ibutang  na sa full alert status ang Central Visayas tungod kay gi-anticipate nang daan sa kapolisan. Ang tanang provincial directors ug city directors kinahanglang mopalihok sa ilang intelligence operations ilabi na sa mga kalihokan sa NPA.

Tanang mga polis bisan kadtong nibakasyon kinahanglang mobalik sa ilang unit aron mo-report.

Samtang ang mga maneuver units sa rehiyon sama sa Public Safety Company ug sa Regional Public Safety Battalion gipakatap na sa rehiyon alang sa pagpakgang sa mga NPA.

Gipasalig niya sa publiko di angay mabalaka tungod kay ang naandan na nga militar ug polis lang ang target sa NPA.

Ang magtiayong Tiamzon dunay reward nga P5.6 milyon matag usa ug nahimong posible ang maong pagkasikop pinaagi sa tabang sa publiko.

Matud ni Constantino nga wala pa silay kasayoran sa epekto sa pagkasikop sa magtiayon apan dako ilang pagtuo nga dako kini og impact sa ilang pundok.

Sa laing bahin, ang Armed Forces of the Philippines- Central Command andam na alang sa kasaulugan sa CCP-NPA anniversary karong Sabado.

Bisan pa man nga anaa karon sa red alert ang kasundaluhan, kinahanglan gyud nga siyento porsyento ang attendance sa tanang personnel sa ilang mga tagsa-tagsa ka unit sa rehiyon 6,7, ug 8.

Si Lt. Jim Alagao, Centcom spokesperson, mitug-an nga ang habagatang Sugbo gibantayan kini sa 5th Special Forces Company nga gipangulohan ni Commander Anchises Diola samtang ang amihanang Sugbo aduna usay 78th Infantry Battalion nga dunay mga platoons ug detachments.

Prayoridad sa AFP ang Samar, Negros Occidental ug mga lugar sa Iloilo nga ilawom sa 8th Infantry Division kay matud pa dili pa kini insurgency free. (BANAT NEWS)