26 na ka most wanted ang nadakpan

CEBU, Philippines - Kapolisan sa rehiyon nakasikop na og 26 ka mga tawo nga most wanted sulod lang niining tuiga.

Si Chief Supt. Danilo Constantino miingon nga prayoridad nila karon ang pagpangita sa mga wanted persons ilabi na kadtong nalambigit sa mga linoog nga krimen.

Target sa rehiyon nga sikopon karong tuiga pa ang 775 ka mga tawo nga naglangkob na sa mga probinsya sa Bohol, Negros Oriental, Siquijor, Sugbo ug sa mga dakbayan sa Lapu-Lapu, Mandaue ug sa Sugbo.

Sa miaging adlaw giapod-apod sa kapolisan ang mga paypay nga may hulagway sa mga wanted nga mga tawo sa rehiyon nga may numero sa Regional Intelligence Division aron sa daling pag-report sa katawhan kung duna silay masigpatan nga mga tawo nga naa sa maong paypay. Apan gitataw ni Constantino nga ang mga city ug provincial director ang nag-set sa ilang kaugalingong target nga dakpon ug mao usab ang mga police stations.

Sa laing bahin, nadakpan ang duha ka tuig nang nagtagotago nga usa sa most wanted person sa dakbayan sa Lapu-Lapu kagahapon sa buntag. Ang nasikop mao si Moises Hiyas Jr., 25, residente sa Sitio Abuno Brgy. Pajac dakbayan sa Lapu-Lapu dunay kasong murder ug frustrated murder. Apan nakaipsot ang amahan niini nga si Moises Hiyas Sr. nga duna say pending warrant sa kaso sa illegal nga drugas nga giluwatan sa Lapu-Lapu RTC Branch 27 diin karong Abril 25 unta ang sunod nga bista sa kaso niini. Matud pa ni Station 2 police chief, Chief Insp. Conrado Manatad nga si Moises Jr.  nakapusil patay ni Kirth Nigel Ngujo niadtong Pebrero 13, 2012 ug nakaangol og usa.

Gikan adto, nagtagotago na si Moises Jr. sa Negros Occidental sud sa duha ka tuig apan nibalik dinhi ug nasigpatan kagahapon sa mga silingan nga maoy mi-report sa kapolisan.

Nakuha gikan niya ang usa ka snub nose nga kalibre .38 nga may  lima ka bala, samtang sa lawak sa amahan niini nakuha usab ang mga drug paraphernalia. (BANAT NEWS)