HPG-7 dili pagawson

CEBU, Philippines - Ang mga konsehal sa dakbayan sa Sugbo miawhag ni PNP Chief Alan Purisima nga ang tanang sakop sa Highway Patrol Group-7 ipa-restricted sulod sa Camp Sotero Cabahug.

Tumong ni Konsehal Gerardo Carillo nga ang mga sakop sa HPG-7 anha ra sa kampo aron dali ra sila nga mapatawag kun ang Special Investigation Task Group-Archival ug National Bureau of Investigation (NBI)-7 padayon karon nga nag-imbestigar aron mahibaw-an kinsa gayud ang nagbanhig ug nagpatay ni Atty. Noel Archival ug sa duha niya ka kauban.

Gusto ni Carillo nga imbentaryohon sa HPG ang tanan nilang gi-impound nga sakyanan ug ihatag ang lista sa NBI. Ang ilang armas ipa-ballistics usab aron itandi kun aduna ba niini nga gigamit sa pagpamanhig.

Matud ni Senior Insp. Oliver Plania, tigpamaba sa HPG7 nga andam silang motuman sa bisan unsang mando gikan sa ilang labaw, apan dili lang sila mokomento ni Carillo apan andam silang motuman kun may kamandoan sa ilang ulohang buhatan. (BANAT NEWS)