Talisay landing karon

CEBU, Philippines - Ang tanang kawani sa kagamhanan sa dakbayan sa Talisay giawhag nga mosaksi sa pagahimoon’g kalihukan karong buntag sa pagsaulog sa Takas sa Talisay nga naila kaniadto nga Talisay Landing.

Si Talisay Mayor Johnny De los Reyes miingon nga  base sa Republic Act 10359 gideklarar nga “special working holiday” sa probinsiya sa Sugbo ang kasaulogan sa American Landing sa Talisay.

Matud ni De los Reyes nga “compulsory” ang attendance sa tanang kawani sa Talisay City Hall karong adlawa.

Ang kalihukan buksan sa usa ka Santos nga Misa alas 6:00 sa buntag ug isunod dayon ang Talisay Landing diin ipakita ang pagtakas sa mga sundalo’ng Amerikanhon diha sa kabaybayonan sa Talisay kaniadto.

Si kanhi kongresista Eduardo Gullas maoy miduso sa balaud nga nagdeklarar nga matag Marso 26 sa matag tuig usa ka special working holiday.

Matud ni Gullas nga ang pagdeklarar og local holiday sa mao nga adlaw makahatag og kabililhon sa kasaysayan sa lugar lakip na sa kultura.

Ang kasaulogan maglakip sa re-enactment, parada sa grupo sa kasundalohan ug kapolisan, mga tinun-an ug mga beterano sa ikaduhang gubat sa kalibutan.  (Brenda D. Batuto/RUB)

Mga polis sa CPPO gipakalitan og drug test

Ang tanang polis nga nadistino sa Cebu Provincial Police Office (CPPO) gipakalitan og drug test kagahapon aron pagsuta kun kinsa kanila ang adik.

Hinoon, wala dayon ibutyag kun aduna ba’y mga polis nga namatud-ang positibo sa paggamit og gidili nga matang sa illegal nga drugas, sama sa shabu.

 Adunay gibana-bana nga mga 100 ka polis nga anaa madistino sa headquarters sa CPPO nga nagbase sa Sitio Sudlon, Barangay Lahug.

Ang drug test sa CPPO gipahigayon pipila ka adlaw human nabulgar nga adunay upat ka polis nga nadistino sa Regional Intelligence Division (RID) sa Camp Sergio Osmeña Sr. Ang hepe sa RID nga si Superintendent Paul Labra II miingon nga ang pagpahigayon og kinalit nga drug test usa kini ka paagi sa ilang counter-intelligence strategy.

Dugang ni Labra nga buot nilang ipakita sa katawhan nga seryoso ang kapolisan sa ilang kampanya batok sa illegal nga binuhatan sa mga polis.

 Matud ni Labra nga himoan pa nila og confirmatory test ang pasiuna nga resulta ug kun mapamatud-an nga positibo g’yud posible nga mag-atubang og kaso’ng administratiba ang mao nga mga polis.  (BANAT NEWS)