Dili magdali-dali pagtukod og building sa Bohol – DENR

CEBU, Philippines - Ang Department of Environment and Natural Resources (DENR-7) mirekomendar nga wala usa’y pagatukoron nga panimalay sa mga dapit sa Bohol nga nakasinati og aftershocks sa linog ug adunay kapin usa ka libo ka sinkholes nga nakita.

Matud sa tigpamaba sa DENR-7 nga si Ed Llamedo nga ang labing maayo nga buhaton nga susihon usa sa mga eksperto sa dili pa mohimo og kalamboan.

Ang DENR nakadawat og kaliboan ka request gikan sa mga housing sites ug 650 ka school sites nga nag-awhag og “mapping” kay gamiton kini sa pagkuha’g clearance   aron katugotan ang ilang construction. Giklaro ni Llamedo nga ang DENR-Mines and Geosciences Bureau (MGB) dili mohatag og clearance apan igo lang sila mopagawas og threat advisory.

Aron pagtubag sa request nga gipadala kanila naghimo sila og capability building sa mga municipal engineers, planning development officer aron makahimo og site assessment report.

Nasayran nga gitinguha ni Bohol Governor Edgar Chato nga mapadali ang plano aron hingpit nga makasugod na ang pagtukod sa mga housing ug school building sa mga dapit nga naapektuhan sa grabe’ng pagtay-og sa 7.2 Magnitude nga linog sa Bohol.  (BANAT NEWS)