2 gipamusil patay

CEBU, Philippines - Duha ka mga tawo ang gipamusil patay sa managlahing dapit sa Sugbo, usa kanila adunay mga kaso nga frustrated murder, direct assault ug grave threats diha sa lungsod sa Dalaguete. 

Wa nay kinabuhi pag-abot sa tambalanan ang biktimang si Gerry Laguna, taga Barangay Sacsac, Dalaguete dihang gipusil sa duha ka wa mailhing mga lalaking nagmotor niadtong Lunes sa hapon. Si SPO1 Veronico Sentino nga nahinabi sa Banat News miingon nga ang biktima may kaso sa Municipal Trial Court sa Dalaguete ug sa Cebu Prosecutor’s Office tungod kay nakigpinusiay kini sa mga polis nga miresponde sa usa ka alarma diha sa ilang dapit human niini gipusil ang usa ka “Francing Gamboa” sa milabay’ng tuig.

 Sumala pa ni Centino nga sa wala pa mahitabo ang insidente ang biktima ug iyang igsuon nga si Sofronio nga nangilkil sa mga drayber sa habal-habal diha sa videokehan nga ilang giimnan aron ipalit og bino. Ang pagpamusil nakuhaan og footage sa CCTV camera.  Samtang patay usab ang usa ka drayber sa traysikad samtang naghulat kini og pasahero sa Forbes Bridge, Tupas Street, Barangay Pasil sa dakbayan sa Sugbo pasado alas-2 kagahapon sa kaadlawon. Ang biktima naila nga si Felipe Pancho, 34, taga Barangay Mambaling, samtang ang mga suspetsado naila nga sila si Emmanuel Orongan, taga Mambaling ug usa ka James Taga,taga Duljo-Fatima sa dakbayan sa Sugbo. Ang biktima naigo sa likod sa iyang ulo, tuo nga kilay ug sa iyang wala nga bitiis ug patay na pag-abot sa Cebu City Medical Center.Nadakpan sa kapolisan sa San Nicholas Police Station nga gipangulohan ni SPO4 Sanrico Jolejole si Orongan. (Bryner L. Diaz/EIM)

Igsuon ni  JVR, local officials  imbestigahon sa DENR

Mihimo og imbestigasyon ang Department of Environment and Natural Resources (DENR-7) mahitungod sa  nadawat nga report nga illegal logging sa barangay Manipis, dakbayan sa Talisay niadtong Marso 11. Matud ni Ed Llamedo tigpamaba sa DENR-7 nga human sa gihimong imbestigasyon ilang nasayran nga walo ka mga dagkong mahogany nga kahoy ang naputol sa maong barangay.

Nasuta nga walay permit nga gihatag ang DENR sa pagputol sa mga kahoy tungod kay aduna silay moratorium sa pagpamutol og kahoy kini base na sa ilang Executive Order No. 23.

Matud ni Llamedo adunay exemption sa Executive Order No. 23  ang government projects apan ang ilang regional executive director dili makaisyu og tree cutting permit kung walay clearance sa DENR Central Office.

Ang DENR-7 mopadala og notice of hearing ngadto nila ni  Eduardo Abalo, Antonio Javerina pulos barangay konsehal sa Manipis, school head Roger Bajo,  Virgilio Bastida, chainsaw operator Marciano Silva, Roldan Basamayor ug sa igsuon ni Mayor Johnny De Los Reyes  nga si Wilfredo De Los Reyes.

Sumala pa ni Llamedo nga ang pagpamutol og kahoy gihimo sa Osmeña Reforestration Project sa DENR nga sakop sa Presidential Decree 705 ug Executive Order No. 23. Si Talisay City Mayor Johnny De Los Reyes miingon nga adunay nanghuwam kaniya og chainsaw tungod kay dunay putlon nga kahoy nga giingong nakababag sa dalan apan wa na siyay kasayuran nga aduna pay daghang kahoy nga gipamutol.  (BANAT NEWS)