Duna pay laing langyaw nga gi-monitor ang tcps

CEBU, Philippines - Ang Talisay City police miangkon nga aduna pa silay laing gi-monitor nga mga langyaw nga posibleng nalambigit sa human trafficking sa dakbayan human sa pagkasikop sa usa ka Swedish national didto sa Barangay Dumlog sa miaging adlaw.

Si Supt. Resty Santos, police chief, mibutyag nga aduna silay gitan-aw nga laing lima ka mga langyaw nga pirmeng makit-an sa mga pampublikong kaliguanan sa barangay Poblacion nga adunay mga kaubang minor de edad. Ang maong mga bata sagad nagpangidaron og 16-anyos paubos ug dili taga dakbayan sa Talisay, matud pa ang maong mga batan-on nag-make up ug nagsul-ob og seksi. Ang operasyon batok kang Christer Johansson, 60, posibleng nakapaalerto sa ubang langyaw nga sama og binuhatan sa suspek. Si Johansson nasikop sa Anti-Cybercrime Group-7 pinangulohan ni Sr. Insp. Michael Virtudazo ug Talisay City police pinaagi sa search warrant for RA 10364 or Expanded Anti-Trafficking in Persons Act issued by Regional Trial Court Judge Macaundas Hadjirasul, Branch 8, Cebu City.

Duha ka mga menor de edad ang naluwas ug anaa karon sa kustodiya sa Department of Social Welfare and Development alang sa debriefing. Nakuha sa operasyon ang laptops, external drives ug mga digital evidence nga posibleng adunay law-ay nga hulagway sa mga bata. Ang mga ginikanan sa duha ka menor de edad nga na-rescue sa kapolisan gikatakda nga pakigkitaan sa DSWD. Ang duha ka menor de edad nga nagpangidaron og 14 ug 15 anyos ipaubos sa psychosocial examination aron pagwagtang sa ilang kakuyaw sa pagtuo nga gidakop sila sa mga awtoridad.

Matud ni Edna Regudo social welfare sa DSWD-7 nga walay giangkon ang mga bata nga nalambigit sila sa cyber pornography hinungdan nga ang kapulisan na ang mosusi kun unsang kaso ang ipasaka batok sa Swedish national nga si Christer Johansson,.

Miingon usab si Regudo nga ang gisulti sa mga bata kanila mao nga higala lang nila ang maong langyaw ug igo lang sila nangaon, nag-chat ug nangaligo sa apartment niini. Tungod niini nanawagan ang DSWD-7 sa mga ginikanan nga bantayan gyud kanunay ang kalihukan sa ilang anak aron di kini malambigit sa mga daotang binuhatan. /EIM (BANAT NEWS)