Nasunogan pa, natumbahan pa sa haligi

CEBU, Philippines - Doble ang dimalas sa usa ka 18-anyos nga biktima sa sunog sa Barangay Lorega-San Miguel kay nabali pa g’yud ang iyang bitiis sa dihang natumbahan siya og haligi samtang nanguha’g kabilya sa nasunog nila nga balay.

Si Ardel Buoyaban, 18, nanguykoy og kabilya sa ilang balay dihang natumbahan ug maayo nga pagkabali sa iyang tuo nga bitiis ug anaa siya karon na-admit sa Vicente Sotto Memorial Medical Center.

Si PO1 Reoful Adalim sa Homicide Section sa Cebu City Police Office (CCPO) miingon nga ang konkreto’ng haligi natumba ngadto sa biktima dihang gidumbol sa bulldozer sa City Hall nga nagsugod na paglimpyo sa lugar alang sa road re-blocking.

Ang road reblocking gimando ni Mayor Michael Rama aron adunay maagian ang trak sa bombero kun mahitabo ang laing sunog sa mao nga dapit.

Matud ni Adalim nga ang biktima nagkinahanglan og operasyon sa iyang nahiaguman nga pagkabali sa bitiis.

Wala pa usab masuta kun ang kabanayan ni Buoyaban mopasaka ba og kaso sa drayber sa City Hall bulldozer.  (BANAT NEWS)