Ubang biktima sa sunog sa Lorega patrabahoon sa DOLE
CEBU, Philippines - Ang Department of Labor and Employment (DOLE) motabang sa ubang biktima sa sunog sa Barangay Lorega-San Miguel pinaagi sa pagpatrabaho kanila aron kakuhaan nila og panginabuhian.
Si DOLE-7 Regional Director Gloria Tango miingon nga ang ilang programa susama sa gihimo nila sa mga biktima sa bagyo nga Yolanda nga nakapahimulos sa “Cash for Work program.â€
Matud ni Tango nga kadtong makapahimulos sa programa mao ang nag-edad na og 18-anyos pataas nga makadawat og suhol nga P327 ang adlaw apan wala pa mahibaw-i kun pila ang makatrabaho ubos sa mao nga programa.
Gipasabut ni Tango nga ang trabaho nga itanyag sa DOLE-7 mao ang paglimpyo sa nasunogan diha mismo sa Barangay Lorega-San Miguel nga sila ra usab ang makapahimulos.
Gikataho nga ang mga kawani sa Cebu City Hall mosugod na karong adlawa sa paghimo og karsada lagbas sa taliwala nga bahin sa nasunogan aron nga masayon ra sa mga bombero ang pagresponde kun adunay sunog.
Matud ni City Engr. Jose Marie Poblete nga gihatagan siya og tagal ni Mayor Michael Rama nga kinahanglan nga usa ka buwan gikan sa sunog ang mga nasunogan makabalik na pagtukod sa ilang kabalayan.
Gawas sa Cash for Work program sa DOLE, si direktor Tango mipahibalo nga ang DOLE motanyag usab og livelihood training aron makat-on ang mga biktima sa sunog og alternatibong matang sa panginabuhian.
Kapin sa 5,000 ka molupyo sa Lorega-San Miguel ang nawad-an og kabalayan atol sa sunog sa miaging semana. (BANAT NEWS)
- Latest
