DPWH kontraktor gipasidan-an sa City Engineer

CEBU, Philippines - Si Cebu City Engineer Jose Marie Poblete miawhag sa mga kontraktor nga gikuha sa Department of Public Works and Highways (DPWH) aron pag-aspalto sa mga gubaon nga karsada nga dili langayon ang ilang proyekto. Reaksyon kini ni Poblete human ang iyang opisina nakadawat og mga reklamo kabahin sa karsada dapit sa atubangan’g bahin sa Marco Polo Hotel nga gikaskas sa kontraktor nga gikuha sa DPWH unya gibiyaan lang nga wala tiwasa pag-aspalto unom na ka adlaw.

Mga sakyanan nga anaa kanunay mag-agian sa karsada nga gitawag og Veterans Drive kanunay’ng nagbagolbol tungod kay giguba ra ang karsada nga wala tiwasa sa pagtrabaho.

Nabantayan nga nindot ang mao nga bahin sa karsada apan gituyo lang gayud sa pagkaskas sa kontraktor aron unta aspaltohon apan wala tiwasa ang proyekto.

Matud ni Poblete nga unta ang kontraktor angay pa gani nga mobisibis og tubig sa gikaskas nila nga karsada aron dili makamugna og grabe nga abog, ilabi na panahon sa ting-init.    (BANAT NEWS)