Usa namatay sa AIDS

CEBU, Philippines - Gipahibawo sa Department of Health (DOH-7) nga may usa na ka tawo ang namatay gumikan sa full-blown Acquired Immunodeficiency Syndromes (AIDS) dinhi sa Sugbo.

Si Renan Cimafranca, pangulo sa Regional Epidemiology and Surveillance Unit (RESU) sa DOH-7 mitug-an nga ang maong pasyente namatay sa usa sa mga HIV/AIDS treatment hubs dinhi sa Sugbo nga mao ang Vicente Sotto Memorial Medical Center niadtong bulan sa Enero ning tuiga. Apan daling giklaro ni Cimafranca nga ang namatay dili taga Sugbo kay gikan sa laing probinsiya gawas sa Central Visayas ug dinhi lamang sa Sugbo nagpatambal.

Si Cimafranca nagdumili sa pagtug-an sa pangalan ug address sa naasoy nga biktima og AIDS sanglit gikonsiderar man kini nga sensitibong kaso.

Gipahibawo hinuon ni Cimafranca nga ning nilabay’ng tulo ka bulan, ang ilang buhatan nakatala og tagsa ka mga bag-ong nataptan og Human Immunodeficiency Virus (HIV).

Ang hinungdan sa pagtakboy sa maong sakit mao ang pagbanos-banos og gamit og syringes sa mga tiggamitan og illegal drugs. Ikaduha ang "unprotected sex" o ug ang pakighilawas sa kaparehong lalaki o babaye.

Gihingusgan  sa DOH-7 ang kampanya sa paggamit og condom nga bugtong nakitang solusyon aron di matakboyan sa maong sakit gikan sa pagkighilawas. (/EIM)(BANAT NEWS)