Bata naunay og patay sa papa

CEBU, Philippines - Naunay pagpatay sa usa ka amahan ang iyang utso-anyos nga anak-lalaki ug naangol pa g’yud ang manghod niini’ng babaye dihang naigo sila sa mga bolitas gikan sa binuhat-buhat niya’ng shotgun didto sa dakbayan sa Toledo kagahapon sa buntag.

Si Chief Inspector Michael Anthony Bastes, hepe sa Toledo City Police Station, miingon nga ang suspetsado nga si Bobby Miñoza mipabuto sa iyang “sumpak” sa kapikal nga dili mobayad ang iyang ugangan sa bayranan nila sa kuryente.

Ang namatay mao si Michael Miñoza samtang ang naangol mao ang iyang manghod nga si Angel, 7, mga molupyo sa Barangay Sto. Niño, dakbayan sa Toledo.

Si Jovenal Jimenez nga radio operator sa Toledo City Police Station miingon nga aksidente nga napusilan sa amahan ang duha niya ka anak kagahapon sa alas 9:30 sa buntag.

Base sa imbestigasyon sa kapolisan, ang suspetsado nakiglalis sa iyang ugangan ug sa iyang bayaw kabahin sa ilang bayranan sa kuryente. Si Bobby mi-tap ra sa kuryente sa balay sa iyang ugangan apan siya maoy nagbayad sa tanang bayranan.

Matud pa nga kapin sa tuig na nga si Bobby maoy kanunay’ng nagbayad sa kinatibuk-ang bayranan mao nga gusto na unta niya nga mutabang pagbayad ang iyang ugangan ug bayaw apan nahitabo ang grabeng panaglalis.

Nasuta sa imbestigasyon nga tungod sa kapungot gikuha ni Bobby ang iyang “sumpak,” usa ka matang sa hinimo-himo nga shotgun nga mora’g pugakhang ug gipabuto kini didto sa gawas sa iyang balay.

Apan wala mahuna-huna ni Bobby nga ang mga bolitas nga gikan sa bala mulapos sa bungbong nga hinimo lang sa habol ug adto mahipunta sa nangatulog pa nga bata didto sa sulod.

Ang samaron nga mga bata dali unta nga gidala sa Balamban District Hospital sa ilang amahan apan ang utso-anyos gideklarar nga patay na ug ang manghod gibalhin sa tambalanan dinhi sa dakbayan sa Sugbo nga may samad sa abaga.

Matud ni Chief Inspector Bastes nga daling gidakop sa iyang mga sakop si Bobby ug pasakaan kini og kaso nga parricide ug frustrated parricide adto sa piskaliya sa Toledo karong Lunes.  (/RUB)(BANAT NEWS)