Polis nagmaoy sa police station, iyang hepe gitiona’g armas

CEBU, Philippines - Usa ka pulis ang gipangita karon sa kapulisan sa Dumanjug human kini giingong nanion sa iyang armas ngadto sa iyang hepe sulod sa Dumanjug Police Station kagahapon sa kaadlawon.

Si PO2 Socrates Avila, taga barangay Paculob, nadestino sa Dumanjug Police Station ug on duty sa dihang mibiya kini sa police station gamit ang patrol car nga wala mananghid sa iyang labaw nga si Sr. Insp. Cesar Misola. Matud pa nga gipagawas usab ni Avila ang piniriso nga si Sosimo Pace ug giuban niya kini sa haya didto sa Barangay Ilaya apan didto giingong nadasmag ang gimanehong patrolcar niini sa signage board daplin sa dalan. Matud pa ni Misola nga ang nahimo ni Avila igo na kaayo nga basehan nga pasakaan nila kini og kasong administratiba ug kriminal sa Office of the Ombudsman Visayas sunod semana. Matud pa nga si Avila naabot mga alas 10:00 sa gabii adtong Miyerkules ug nakainom na kining daan. Si Avila jail guard ug desk officer kini sa police station apan inay nga mo-duty mibiya hinuon kini kay mibilar sa patay.

Anang ala 1:00 sa kaadlawon nakadawat og tawag si Misola nga nabangga ang patrol car nga gimaneho ni Avila hinungdan nga gipaapasan kini niya og pulis. “Naabutan pa nang mga pulis ko na andu’n sa may patay kaya pinabalik nila sa police station,” matud ni Misola kinsa midugang nga wala gani siya tagda niini sa dihang miabot kini sa police station.

Misuway og estorya si Misola kang Avila apan matud pa nga misaka ang tingog niini hinungdan nga gipangayo ni Misola ang armas sa suspek apan inay nga ihatag mikalit na hinuon kini og tion sa iyang service .38 revolver.

Daling midagan si  Misola sulod sa iyang opisina ug gikuha ang iyang issued 9mm pistol. Gumikan niini naalerto ang uban pulis sa buhatan ug daling mitago. Taud-taud sa dihang nakadungog na lang si Misola nga adunay milagapak sa lamesa ug midagan si Avila gawas sa buhatan.

 Gigukod pa kini sa kapulisan apan wala na kini maabti ug hangtod ron gawasnon pa kini.  (BANAT NEWS)